丼瀛 (已結業)

老公又带我食日本嘢，心谂呢排成日食有咩咁特别啫，仲要山长水远入观塘🤧入到去坐低，老公话由佢发板，佢准备叫啲好有特式嘅嘢俾我试。头盘系温室蕃茄豆腐沙律配胡麻酱，成盘都系我钟意嘅嘢😆啲菜咬落去「索索声」架！豆腐又够晒滑嫩～加埋胡麻酱一齐食个味道刚刚好～我真系好钟意食明太子！老公居然识点明太子炒翠玉瓜，呢味𩠌就真系冇食过，估唔到个味道又几夹！明太子有少许辣，虽然用大量嘅明太子淋上翠玉瓜上面，但一啲都唔会觉得咸！清清地仲可以一解炸物嘅油腻感添～接住落嚟就系杂锦天妇罗～入面有冬菇、紫心番薯、炸虾、茄子，虽然系炸物但一啲都唔觉得食完会腻，可能因为炸粉够薄👍🏻我哋上次食完甲罗烧太难忘，所以老公今次再叫甲罗烧松叶蟹肉丼翻啅！呢碗丼饭入面有蟹膏又有蟹肉，仲有蟹籽，浓郁嘅蟹味仲充斥住成个口腔，超钟意呢个蟹肉丼呀！！！！跟住到令人惊艳嘅串炸摩天轮出场！呢个摩天轮一上枱，隔离枱嘅食客就望晒过嚟😆唔同嘅篮放咗唔同嘅炸物，有炸蚝、炸芝士、炸豆腐（入面居然有蟹籽）、炸鸡粒、炸饺子、炸紫薯饼（入面仲要有栗子粒）！最钟意系炸紫薯饼，蕃薯好甜好香，直头可以留嚟做甜品！