P.B.S. Premium Burger & Sandwich (已結業)

呢间汉堡包店取名P.B.S.，其实就即系全名Premium Burger & Sandwich，最近新开座落于铜锣湾食肆林立嘅希云街，今日就约埋朋友嚟试吓。霓虹光影下显得店外店内都份外璀璨。呢度主打都系食burgers，另外都有一系列嘅小食可供选择。我都系看图识字嘅人，睇相见到大大只龙虾就一于叫返一个试吓。呢个原只龙虾三文治卖相真系攞满分💯，三文治上布满切咗嘅龙虾肉，仲有放咗龙虾钳，相当之有气势，酱汁配搭亦得宜，所以嚟到一定要叫返一客试试。另外再叫埋招牌至尊和牛汉堡。叫得至尊当然非同凡响，剩返睇佢嘅横切面已经知道够晒份量十足，和牛汉堡扒够晒Juicy就已经系基本嘢，佢仲有煎蛋、牛油果、啡菇、烟肉、蕃茄、生菜、双重芝士，仲有黑松露酱，我个口咁大都真系咬唔晒！芝士薯条每条薯条已经沾满咗芝士粉，再喺上面「加料」，然后配合芝士酱一齐食，呢个价钱真系好抵食。黑松露薯条同样系每条薯条都已经沾满咗黑松露粉，再配埋黑松露酱，真系食到舔舔脷。果汁属来自葡萄牙嘅樽装饮品， $15一啲都唔贵。