包販子 (已結業)

啲人话食包包食饱，今日就去试下包贩子自家制包包！舖头外形比较日式，仲有少江户时代味道，玩味搞鬼装修，气氛感觉年轻又轻松。门口有大量玩具摆设，而且相信大部分都有一定年纪。 除咗摆设，唔难发现嘅，仲有喺餐牌同埋墙上面都会见到，贯彻到尾好可爱嘅肥仔插画。 铺头名都叫得做包贩子，第一样就梗系叫包啦！佢哋自家制嘅面包口感非常特别，睇落去似系实的的嘅包，点知一啖咬落去，空气感好重，完全唔似食紧面包。中间夹住嘅系足足完整一只软壳蟹，加埋牛油果同埋生菜一齐食，可以平衡返个油腻感。意粉一上到枱面，就有一阵青酱味飘埋嚟，非常吸引。羽衣甘蓝系有调过味炒过嘅，有少少牛油味，松子都有爆过先洒上面，味道唔错。呢个鸡软骨比一般食开嘅细粒，所以唔会好似平时食鸡软骨咁，咬到牙都攰都未食完一碟。 饮品就大大只字写系墙上面，大部分饮品都清清地，简单简单。本身以为杯梳打实系普通嘢，但系饮饮下发现杯嘢饮都几真材实料，里面充满着真果肉，梳打同果汁嘅比例非常好，唔会太酸又唔会太甜。整体黎讲，呢到位置同环都几好，邻近马路可以泊车，座位枱櫈亦都适合一家大细，唯独食物种类唔多，但质素唔错，价钱都好合理！