淳吟居酒屋 (已結業)

凉风送爽嘅夜晚，行完西九文化区拍拖，再嚟到渡船行呢头揾嘢食，见呢间居酒屋感觉几好，就拣咗佢。先食一个软棉虾夷鹿肉汉堡扒两食(紫苏)，味道我觉得似淡少少嘅汉堡牛扒，配上有萝卜蓉嘅酸汁，十分惹味。再嚟一个柚子胡椒鸡腿肉串烧，外皮香脆，内层肉质就嫩滑，有少少柚子甜香，相当唔错。然后食土手味噌煮日本黑毛和牛牛杂，啲牛杂就冇香港𠮶种有埋牛肚同牛栢叶，主要系牛腩同牛筋，炆得好冧好入味；但我反而最爱嘅系萝卜，啲汁入哂冧冧啲萝卜系好吸引架！！然后有海鲜大阪烧，细细个但都好足料，酱汁木鱼唔会太多，恰到好处。清清地嚟个北海道带子配纪州南高梅子冷素面 ，冷面好似有啲淡淡地嘅花香味，配上个汤汁，食完觉得好舒畅。甜品有个蕨饼，系餐厅送架。黄色𠮶嚿用左黄豆粉，爽口啲冇咁甜，绿色𠮶嚿系绿茶味，烟韧啲甜啲，建议先食黄再食绿，另外有啲红豆蓉伴碟，有个甜甜嘅结尾。