Wooden House (已結業)

朋友來北角呢間意大利餐廳食晚飯，因為唔算好肚餓，所以我地淨係叫左兩個main course同甜品。呢間餐廳佈置好簡約，睇Menu介紹話呢道食材係選用天然同有機材料煮製！Chocoalte Flurry有好大球朱古力雪糕裡面，雪糕係苦甜嘅味道，所以並唔膩，溶左之後會同裡面嘅奶昔混合一齊，口感好軟滑，好好飲！Salmone alla griglia有別於一般餐廳嘅三文魚，呢度係用一塊紙包住魚同汁來煮。挪威三文魚肉又滑又軟，而且無咩腥味，個汁混左刁草、薯仔、酸忌廉，唔係太濃味，所以可以嚐到三文魚嘅鮮味。Griglia 呢個法國黃油燒春雞皮脆肉嫩，雞肉真係好嫩滑，皮下脂肪亦都唔多，配埋香草、青豆同牛肝菌嘅汁，味道幾好！甜品我地就簡左雪糕，呢度間餐廳嘅雪糕係意大利Gelato雪糕，而且每日新鮮製作。呢個莓果味嘅意大利雪糕夠凍夠硬身，酸酸甜甜，食飽飯後食d酸味嘅野做甜品就最適合。試左少少朋友點嘅雲呢拿雪糕配朱古力窩夫。雲呢拿雪糕奶香味濃郁，朱古力窩夫烤得香脆適中，朱古力味好濃，唔會係烤燶左嘅味！