波記粉麵專家 (已結業)

星期二同个旧行家食饭，原本谂住行上鸭巴甸街吃日本拉面，点知执左，退而求其次谂住去士丹顿街食上海面，又执埋。看来非关饮食业市道回落，可能是地产市道向上的现象而已。结果来了这间在苏豪边开左唔少日子，但就一次都未来过的面档吃牛腩面。米睇佢舖位细细，又唔起眼，原来是非常多人帮衬的。来的时候是全店坐满，除了不少是学生，也有OL、白领等，见佢价钱唔算特别平，都咁多人，真系唔简单！两个人，瑟缩在近门口的小小二人台，仲系刚好有人走至坐得低，唔系都要等。朋友叫了筋腩菜面加鱼皮，我要了筋腩捞面要多葱。因为人多，所以都等左差不多十五分钟至有得食。我的筋腩捞几大碟，牛腩同牛筋都多，比例上朋友的筋腩菜面更大碗，筋、腩、菜都多，加埋炸鱼皮，是满到泻咁滞。要了多葱，碗上汤真的非常之多葱﹝见图﹞，可见这里虽然慢，但阿姐一点也没有忘记我的额外要求，值得一赞。牛腩半肥廋，味道比全廋好，但不肥的部份几韧，可以再好一点；牛筋大大旧，炆得腍身、入味又不失口感，有水准，似乎食牛筋好过牛腩；蛋面有点点碱水味，过水可以过清一点就更好。加埋两支汽水，埋单七十蚊有找，两个人都食得饱饱，几抵食，亦能解释多人帮衬的原因，可以一试。