利寶閣 (已結業)

星期日做下孝顺女，带呀妈出去奥海城饮茶。通常一碟点心都有4旧，两个人食又唔食得多款，见利宝阁做紧点心放题就试试佢。点心放题仲会每位送一只鲍鱼酥加花胶灌汤饺，好正正呀！点心放题既点心种类有成60种，基本野虾饺烧卖都可以叫。另外大排档小食、粉面饭同甜品都可以叫㗎。而且点心嘅种类都可以逐碟或者逐只叫嘅，咁就可以减少浪费，食得晒先好嗌！其实点心就同平时食𠮶啲都差唔多，系可以比平时食多啲唔同嘅点心啰。放题送果个原只鲍鱼酥同花胶灌汤饺好正㗎。而我最钟意就系呢度嘅暗然销魂饭同烧汁木鱼酿茄子。因为够晒特别其他酒楼都好少会食到。暗然销魂饭个叉烧虽然好肥，但系好够味，令到成个饭好出色，加埋只半熟蛋，捞埋饭食冇得顶！最后就试埋佢唔同嘅甜品，芒果布甸同杨枝甘露都系正路野。唯一有啲失望嘅就系佢个蛋白杏仁茶，唔知点解佢俾我哋平时食开嘅唔同，好似好多油又淡色咁，见到个样咁都唔敢食。整体来讲啲点心都OK嘅，两个钟可以慢慢食，又试到唔同嘅点心，食到可以捧住个肚走嘅。