球哥燉湯

营业中

休息中

食晏时间喺中上环，揾食艰难，要健康加好食难上加难。辛苦揾嚟志在食，终于比我揾到呢间打正旗号卖汤嘅餐厅。 餐厅位于苏杭街，只做街坊同附近上班族嘅生意，但今日午饭时间已大排长龙，好彩我独自嚟揾食，比我搭枱悭番轮候时间。店内装修简洁光猛，干净整齐。 苹果雪梨白木耳雪茸排骨炖汤配梅菜扣肉$66午市套餐主力系一款炖汤做主力，配小菜或炒粉面。每日有唔同款汤水，只系今日已经有十五款可以拣😳，果然系专家👍🏻👍🏻今日天气干燥，梗要饮碗清润啲嘅汤。炖汤就系炖汤，汤底浓郁厚实，无三个钟头以上火候煲唔出咁醇厚嘅滋味。睇汤料都可见功夫。排骨煲完依然腍滑，饮完无口渴，可见真材实料。梅菜碎切，长时间烹调令梅菜同腩肉都入晒味，传统客家风格，味重，咸中微甜，腩肉尚算松化，送饭一流。可能个汤太好饮，或者扣肉太好食，令我觉得套餐份量偏少，食完唔够喉😁对OL嚟讲就应该啱啱好。难得出街食晏，有妈妈的味道，希望餐厅快啲开分店，否则下次想饮靓汤可能要排到喊先得喇。