一葉小廚 (已結業)

同事生日，出左黎祥华邨的一叶食饭，午市好多人，等左15分钟先有枱，店员明白午饭时间短，一早落定单，有枱就即刻上菜超有效率。一人叫一份午餐，自己要左份盐酥鸡扒配卤肉饭，包埋餐饮都系$52，今时今日呢个价位已经算系好抵食，至少够大份够饱肚。冻蜂蜜红茶同事话试过加钱要珍珠奶茶，但味道不行，咁就乖乖地要返普通的台饮蜂蜜红茶算了，无冰唔够冻外，微甜茶香都ok嘅。肉燥饭细细碗但都好饱肚的，珍珠米软绵有饭香，卤肉半肥瘦够入味，加埋流心蛋好正。盐酥鸡扒超大份的鸡扒，炸粉好厚好脆，鸡肉几滑，饱肚之选。仲有调味粉可以落，重口味嘅我就三款都加晒，个人钟意海苔味。台湾肠（$21）豪一下叫埋小食，小食价钱就偏贵啦，21蚊得一条肠薄切，甜甜地系几好味嘅。煎饺子（$19）仲叫左饺子，呢样又系麻麻地，馅料唔鲜味，又细只又冻，唔抵食。总括黎讲，午餐好味又抵，小食偏贵味道一般，口痕可以叫下，但唔推介。