Casa Pennington (已結業)

同好姊妹庆祝生日，食豪啲都唔介意，于是拣咗呢间西餐厅试吓。之前睇过食评都知唔系平，不过胜在画师会喺甜品上面为客人画画，而且食物质素都高。当日有几款生蚝系半价，所以我哋每款叫咗两只。由于食蚝，所以我就叫咗杯白酒，另外之前上网睇到有人介绍佢哋有个蚝汤，我见几特别而且第二度未必有机会饮到，所以亦都叫咗一碗，而味道的确唔错，钟意食蚝嘅人都会钟意呢个汤。主菜方面我哋叫咗个澳洲M5西冷扒，四百几蚊得三件仔，虽然好食但系实在贵得太离谱！另外叫左一个海胆蟹肉宽条面，呢个二百零蚊嘅价钱我觉得可以接受，加上味道唔错忌廉汁好creamy，一个人都食得晒!(即系份量唔多🤣)最后甜品我哋叫咗个梨挞，由于打电话嚟订枱嘅时候已经同餐厅讲咗朋友生日，所以想画画，而画师真系好用心去画，因为我只系话俾佢听我朋友钟意𠮶只公仔，而画师竟然自己上网揾，呢个真系超赞👍🏻👍🏻，除咗画工要赞之外，其实个梨挞都非常好食，而且仲另外喺我只碟画左只细细嘅公仔（虽然里面嘅字串错左🤣🤣）。