岩盤牛扒 ミディアムレア ステーキ (博文街) (已結業)

老公早前睇到报导，知道有间 “Medium Rare Steak”牛扒店 – 一间可以按照自己食量去落单，而且即切、即磅、即烧嘅扒房！舖头以自助形式，门口餐牌已列明每款牛肉嘅价钱，而且加$28起配套餐添！拣好就直接喺点餐区排队落单，店员会因应客人所拣嘅部位同gram数即切即磅牛扒，今次我就拣咗西冷部位 (300g)加配set1 。落完单，店员就会俾个取餐电子牌我哋，然后就可以入去揾位坐低等喇！另外，呢度仲提供即弃围裙，唔做惊啲牛油会弹到成身都系，好贴心呢！大概等咗十分钟，当个取餐电子牌响&震动就可以出去取餐！店员先将牛扒煎封至三成熟，以锁住肉汁，再放上铁板上，客人可以按自己嘅喜好煎至合适自己嘅生熟程度。块牛扒真系好足份量，西冷厚身有嚼口，肉味味浓，配上自己所选嘅蒜油，真系绝配！另外，如果嫌唔够味的话，本身牛扒已附上烧汁，枱上亦有粉红色岩盐&黑椒可以自己调味，绝对满足所有嘅客人。Set 1 就从白饭、温泉蛋、味噌汤、沙律同饮品中5选3，当中个温泉蛋非常唔错，加上酱油同调味倍添风味。成个set埋单唔使$200，而呢个价钱，呢个质素，我觉得绝对超值⋯下次真系要过嚟试埋其他部位！