素味謀麵 (已搬遷) 新店位置

一向系食肉兽，中环近排冇啖好食，威灵顿街翠华都执埋，Lunch恐慌性冇嘢食，咪周围寻下宝咯。行咗去和安里，之前食过间越南河，原来变咗拉面舖，仲系斋嘅拉面，即系叉烧都冇块，见佢干干净净，咪好又一餐唔好又一餐咯。两个侍应姐姐斯斯文文，成间嘢个feel几正，舒服。点咗蕃茄汤底、牛蒡丸、秋葵、饺，哗，原来斋都好好味。牛蒡丸好好味，弹牙又香，唔会好似其他食素𠮶啲有阵假肉、胶味，秋葵就正常水准啦，只饺就犀利啦，一食就知舖头自己包，啲菜味喷晒出嚟，好似成个田园食入口咁，新鲜有质感，清新舒𣈱。灵魂系个汤，蕃茄甘笋，唔会草青唔会涩唔会太甜。个面虽细细，但都够饱，唔使食咁多肉，爽呀。