奏海鮮火鍋 (已結業)

讲起打边炉，我唔钟意食任食火锅，因为食物种类虽然选择好多，但系质素往往十分之差，食之无味，弃之惋惜。今次又比我揾到好嘅火锅推介，今次就嚟到尖沙咀。-呢度嘅火锅汤底选择非常之多，有成十几款，例如系上品海鲜锅、清汤牛腩锅、杂菌花甲鲜鸡锅等等，而今次我就试吓佢嘅番茄薯仔咸猪骨汤锅。-汤底一上到黎已经十分吸引，因为卖相同埋香味都非常之好。用咗大量新鲜蕃茄、薯仔仲有好多咸猪骨烹调而成，浅尝汤头一啖，茄味极之浓郁，咸猪骨令汤头鲜味十足，令人胃口大开。我觉得打边炉火锅配料固然重要，但系如果汤底做得出色，简直系令成餐锦上添花。-本地手切肥牛，净系睇卖相都知道脂肪分布十分平均，同急冻牛完全冇得比。牛味十分浓厚，肉质鲜嫩有弹性，都算几有惊喜㖞！-另外我亦都好推介佢嘅响铃，呢度嘅响铃系即叫即炸，所以同平时嘅比较起来真系好食好多，食落会仲保留着好香脆嘅感觉，吸埋汤头嘅精华，诚意推介。-另外仲有好多配料都做得唔错，例如系即叫即包嘅牛肉烧卖、黑松露带子饺子、即炸鱼片头等等，整体用料新鲜，水准好高，而且价钱唔贵，性价比几高嫁。