和幸小料理 (已結業)

佢初初开时我已经去过，𠮶阵时成间嘢得两三台客。𠮶阵真系几好味，亦睇住师傅好用心做烧物。跟住我 keep 住一个月去一次左右。近两三个月因去旅行及工作忙而无去。早几日再去，点知又加价又缩水。原本加价系 OK 的，因通涨影响货价我都明白，但一来加幅几大，二来用的手法好狗啰。以前我最钟意食佢哋嘅烧牛舌，一串四块好似卖 $28，每块约 1.5 x 1.5 寸，而且都有番三分厚。而家加到 $32，每块缩水到 0.75 x 1 寸，仲薄到猪颈肉咁，真系好离谱吓！烧鸡翼仲衰。我唔记得加咗几多价，都算啦。我唔记得分量，于是问个 waiter 一串有几多只，佢答两只。到上台时，我心谂佢哋去边度揾咁细只鸡？乜只翼咁细嘅？原来唔系，佢哋将一只鸡翼打横切开来烧当两只！仲有无狗啲？碗和牛乌冬加到 $146 一碗！而且啲稻亭乌冬已经完全无晒以前烟靱的感觉。唔系差，只系普通料。但 $146 碗㖞！净稻亭乌冬佢哋都卖紧 $88 碗㖞！咁嘅料？总之食完呢餐，完有有种「睇住佢大，睇住佢坏」的感觉。我谂我唔会再去了。