新利記 (已結業)

今时今日经济唔好，自然想揾又平又抵的晚餐，可惜西湾河好多食肆食个晚餐郁D都最少要$25。适逢家人北上，而我又懒唔想煮，于是就去新利记食。新利记系西湾河入面算系抵食，炒一丁连茶啡或例汤只系$22，双拚面都只系大约$17，就算要出前一丁都唔驶加钱。我7点前就去到叫外卖，食肆入面差唔多坐满。环境就几挤迫，外面环境就几邋遢，我见到整肠粉的职员刮走肠粉铁盘上的垃圾，之后求其将垃圾掉在地下，周围有苍蝇飞过都无理，附近又无苍蝇贴。以前叫午餐就算叫个双拼面都要等约15分钟，今次叫海鲜炒乌冬5分钟就炒完。海鲜炒乌冬入面有葱、蟹柳、狮子狗卷粒、小量香肠粒及芽菜。师傅炒得唔算「浓」，海鲜料算几多，而且又几大盒，$20有咁既质素都算唔错。海鲜炒乌冬送埋例汤或茶或咖啡。例汤系霸王花汤，但只系得几啖汤有小小味，整体系淡而无味。