臻 (已結業)

久唔久都会好想饮茶，男友话西环呢间点心店好得，所以放假就去左试下喇~迷你潮州粉果 $28先黎试一试D传统点心先，潮州粉果细细粒整得好精致，食果时又方便，可以一啖一粒。个皮都做得好好，好晶莹烟韧，馅又足料，爽口既沙角，花生韭菜样样齐，唔错!!沙嗲金钱肚 $33好怕出面食金钱肚得PAT酱，仲要金钱肚就比得劲少碎湿湿甘。但呢到睇相就知冇呢个问题啦~件件都一片片好完整甘!!金钱肚煮得好软腍，一咬就断，不过最正都系个沙嗲，好香好惹味!!杏香荔芋鸭 $38呢个点心真系超超超得意呀，卖相黎讲真系满分，可爱到唔舍得食左佢。不过可能要造型既关系，荔芋比较实，芋头亦都唔够香~虽然唔算难食，不过可以做得更好~凤爪排骨蒸饭 $48 (送油菜一碟)蒸饭系用个煲仔上，劲大碟，你睇D下排骨，系粒粒分明，唔似出面D茶楼捞劲多粉黎蒸，真系食到排骨既TEXTURE，而唔系一PAT粉。饭都蒸得好靓，粒粒分明架，$48份量甘大，仲有菜送埋，仲要有质素，真系好抵食!虽然呢到既点心比一般茶楼系贵，但质素亦都比出面高，如果你对点心有要求，都值得入去试一试。