重慶劉一手火鍋店 (旺角商業大廈) (已結業)

一直都好想试吓食刘一手，今日终于有机会同朋友嚟试吓啦。旺角刘一手嘅铺面阔落，装修都几舒服，重点系每张枱都好大，唔会好似其他火锅店咁，嗌得太多嘢食就唔够位摆。我地叫咗个火锅套餐，要咗椰子滑鸡同山珍杂菌嘅鸳鸯汤底，内容都几丰富，有招牌刘毛肚同埋爽脆黄喉，仲有雪花肥牛、猪颈肉、鸡肉，丸类方面有牛丸、豆卜鱼腐、墨丸、龙虾沙拉丸，蔬菜方面有冬瓜、娃娃菜、唐生菜、粟米、莴笋，另外仲有个出前一丁。两个汤底都好浓郁，椰子滑鸡超级香，忍唔住饮咗几碗，杂菌锅有超级多杂菌同埋冬虫夏草，感觉好滋补。上菜嘅时候，店员提醒我哋刘毛肚同黄喉只需要渌七至八秒，两样食落都好爽脆，口感好特别。所有肉类都好新鲜，肥牛嘅肥瘦比例适中，鸡肉超级嫩滑，猪颈肉都够肥，好好食。牛丸好令人惊喜，一咬落去就有好浓郁嘅肉汁咇出嚟。豆卜鱼腐大大粒，墨丸入面可以食到一粒粒嘅墨鱼。个人就最钟意龙虾沙拉丸，一咬落去啲馅就流晒出嚟，好特别。佢嘅蔬菜都好新鲜，尤其系粟米同冬瓜，真系好甜。我哋仲嗌咗1L嘅冻菊花桂圆杞子茶，每人可以饮到三、四杯。见到佢入面有好多料，饮到阵阵嘅菊花香味，感觉好清新，好解腻。希望下次可以试埋其他汤底同埋佢嘅海鲜啦。