麺匠 真武咲弥 (已搬遷) 新店位置

周五晚家人各有各开P，小肥唯有食自己，收咗工喺附近兜，结果就行咗入去春园街一家连名都唔系几识读o既「麺匠 真武咲弥」食咗碗拉面医肚。拉面店门外贴满彩图餐牌。XO仔被吸引入店系因为门外位妹妹实在落力又好客，加上透过玻璃窗又咁啱见到带哂手套同帽o既师傅喺度表演，或许这就是缘份吧。小店为搭枱制，枱号可于墙上找到，嘻嘻，当日好好彩地有三号枱坐。餐桌上有齐冻水、水杯、纸巾、筷子、调味料，明显全为自助式。四周墙身都有海报及纸条推介套餐及可追加项目，而且清楚标明只收现金。桌上亦有摆出彩图过胶餐牌。点菜纸简单易填。炙热酱油拉面（$80）：大大碗拉面不单够热，份量亦十分强劲。黄色o既面条烟韧有弹性，酱油汤底香浓而不腻。整碗拉面o既精髓就系顶面𠮶块靓叉烧，其肉质软腍嫩滑，个人觉得系自己食过咁多间拉面舖中最正o既一块叉烧，实属「一番」（Ichiban）！最意想不到就系汤入面𠮶啲猪肉粒都一样咁软熟可口，绝对值得推介！「ごちそうさまでした！」