麵 (已結業)

lunch时段好怕喺中环食，所以今日早啲，12点前就走过嚟快快手食个面先。环境坐得舒适，呢度面嘅选择都几多，本身好想食牛肋骨，不过店员话个汤系辣㗎㖞，于是改食叉烧8小时慢煮秘制叉烧炒乌冬 ($88)包前菜及饮品，前菜有沙律，粟米及豆。不过粟米及豆就普通咗啲，就咁罐头粟米咯。等咗一阵就上菜了，老实说卖相真系好普通，我甚至会用唔靓去形容，以呢度嘅装潢嚟讲，理论上食物嘅卖相唔应该系咁，唔衬！先食一块叉烧，佢嘅软稔程度简直夸张，喺我未真正尝到佢嘅味道之前，一咬落去已经咬开咗，无牙嘅老人家食都完全冇难度！份量其实都足够嘅，不过肥瘦唔适中，除咗咬第一块系偏瘦之外，其余咁多块都系偏肥，大概每一块都系90%肥膏+10%瘦肉，非常可惜，最后食剩好多肥膏。慢煮8个钟嘅关系所以超级入味，直头入味过龙添；至于乌冬，虽然都系肥乌冬，不过炒得好干身，唔系炒到好烂咁样，仲有啲咬口感，好味！如果啲叉烧唔系咁肥嘅话，咁就完美喇！其实好想好想俾负评，不过见服务真系好好，向佢哋提出咗叉烧好肥之后，店员话会亲自向大厨跟进，希望下次再嚟食会有机会食到肥瘦适中嘅靓叉烧啦！