除左有好多款主打既創意卷物，呢度都有刺身，壽司，沙律，前菜小食，天婦羅及炸物，燒物，鍋物，湯，飯類，麵類，串燒。
今晚叫左相撲力士同蜘蛛。兩款卷物擺埋一齊上枱，仲加左食用花裝飾，伴碟有日式芥末同酸薑片。
相撲力士 $103 另加一
相撲力士一客8件，飯卷包住紫菜，入面仲有蟹柳同忌廉芝士，灑上少少黑白芝麻粒。上面鋪上三文魚，吞拿魚或者白身魚刺身，再擠上沙律醬。刺身食落都算鮮甜，我最鍾意入面既忌廉芝士，非常滑溜。
蜘蛛 $93 另加一
蜘蛛係紫菜卷包住炸軟殼蟹，蟹柳，牛油果同青瓜絲。一客五件，三件身兩件蜘蛛尾，賣相唔錯，特別係條尾。炸軟殼蟹好脆，加埋青瓜同牛油果食可減膩，面頭仲加左少少蟹籽。
琦玉網燒牛舌 $78 另加一
琦玉網燒牛舌一客5件，牛舌彈牙有肉汁，調味夠哂鹹，伴有少量沙律菜同甜甜地既汁，可以平衡鹹味。
日式叉燒炒飯 $128 另加一
日式叉燒炒飯份量大概有一大碗左右，炒飯好濕潤，配料有日式叉燒粒，日式魚蛋粒，蛋碎同蔥花。伴有兩片紅酒蘿蔔。
裝修係以木材為主，非常日式。
