古之味 (寶寧大廈) (已結業)

疫情关系，本来计画好既台湾之旅都要无限期押后...之前喺台北误打误撞食过一间好好食既古早味蛋糕，一直念念不忘，望住佢新鲜出炉，传出阵阵浓香蛋味，食落非常松软，而且又唔会好甜。今日行开旺角，人流唔算好多，见到呢间小店外面有人排队，原来卖台湾古早味蛋糕，除咗原味，仲有芝士、朱古力、肉松、抹茶等等，价钱就$55起至$70-80。本来想试原味，可惜要等差唔多半个钟先出炉，赶时间唯有放弃。正当犹豫紧试唔试其他味，忽然见到佢原来有只新口味叫「咖啡合桃」，虽然索价$80，但作为咖啡迷真系忍唔住要买黎试试。买既时候佢已经用盒装好，仲有个透明背心袋，方便拎，几贴心。虽然唔系超级新鲜出炉，但拎上手仲暖暖地，而且几有份量，闻落仲有淡淡鸡蛋糕香味。到最期待既开箱环节，一打开，见到蛋糕面上面啲合桃唔算多，有少少失望，蛋糕尺寸就大约长18.5cm，阔11cm，高13cm，重量大约580g。食落咖啡味突出，有少少似焦糖咖啡味，甜度适中，核桃新鲜且微甜（不过就只系得蛋糕面𠮶几粒）。质地绵密松软唔松散，比一般连锁店既蛋糕实在。当下午茶的话，食四分一左右已有饱（满）足感。总括而言，蛋糕算中上水平，只系价钱进取到令人却步。