上海包餃店 (已結業)

担担面个汤底一般浊不见底，呢度用清汤就份外特别。卖相好靓，睇到大婶厨师用心去放花生碎同肉碎等食材，创造出一个碎料山丘。山丘睇嚟普通，食落先知暗藏少辣，仲集齐软、硬、爽脆三种由唔哃食材带嚟的口感。略嫌面条煮得较林身，见唔少长者街坊嚟食面，煮林啲又确系无可厚非。下次嚟会试吓要求食硬身面，睇吓厨师批唔批。食晒碗面已饱八成，贪心啲叫埋窝贴同牛肉饼。两款食物都唔系煎到脆底𠮶只，色水欠奉，而且唔够热，不过胜在有内涵。窝贴皮薄饀多；牛肉饼有旧式上海店的手作风味，包包软熟冇苦味。要二拣一，首选窝贴。小店只设几个堂食坐位，对住经典绿色纸皮石食饭，感觉好似去咗七、八十年代的公屋。呢种古早风味，同呢个社区真系好夹。