Mee...lemongrass (Megabox) (已結業)

今日初八开炉，啲同事唔想又饮茶开年咁闷😴，去Megabox徘徊无助😵时就见到呢间新开嘅星马🇸🇬🇲🇾菜，平时好少上到11楼咁高揾食，据员工所讲呢间都开咗几个月，不过中午一点🕐所见人流唔算多，一入就有位喇！我地一行四个点咗海南鸡配喇沙、咖喱牛同2个肉骨茶餐，全部唔使五分钟就上齐，大家都极速开动喇！肉骨茶🦴啲料有好多，但汤嘅颜色比较淡，食落亦冇咩药材味，似系肉汤多啲，而主角肉骨唔多入味，亦都无肉味，比较可取就系肉煮得软硬适中，反而作为配料嘅腐竹同豆卜就好入味，而冬菇食咗一旧有苦味就冇再食。同事食咖哩牛🍛就好评不断，除咗白饭🍚够大碗可以配食咖哩，啲牛腩同牛根🐮都煮得好软身，咖哩有好香浓嘅椰香味🥥，送饭真系一流，唯一美中不足就系个汤淡得好似水咁。另一同事食海南鸡🐥配喇沙，觉得喇沙既椰香🥥都好出，但面略为硬身，啲鸡睇落好吸引，食落却冇咩鸡味🐥，令人有啲失望。