羅勒印度餐廳 (海光街)

营业中

休息中

第一次去呢间餐厅，我哋就花咗少少时间，首先要揾佢身处嘅商场仔个入口，而餐厅就藏身在呢个商场仔嘅最深处。餐厅唔算好大，午饭时间已经坐满人，要排队等位，内里嘅装修好有印度色彩，呢度嘅平日嘅中午套餐好简单，得几款玛沙拉/咖喱嘅选择，配naan或饭，有个是日餐汤，但唔包饮品，价钱$65，另外佢有行政午餐供应，特式印度烤肉料理/特式印度蔬菜料理，似大集烩，有3款唔同嘅咖喱，乜都有啲，包饮品，分别$80同$75，骤眼见餐厅入面大半数人都拣呢个。不过我今次净系叫咗个玛沙拉鸡肉套餐食，店员首先奉上是日餐汤，个餐汤系奶白色，有少少辣口，似加咗姜/香茅，几特别。Masala系一种综合香料，由唔同嘅香料炒香磨成粉末而成，常见于印度料理。呢度嘅玛沙拉酱汁香味浓，易入口，开始食时唔觉辣，但越食会觉得越嚟越辣，不过辣嘅程度对于唔太食得辣嘅我都接受到。而值得一赞嘅系套餐配嘅naan，每人两块，奉上时仲热辣辣，而且好软熟。