東海酒家 (已結業)

屋企人想食乳鸽，揾匀晒四周围嘅外卖，咁啱见到东海晚市做紧优惠，仲有红烧乳鸽食，于是就买外卖黎试下啦。以下系折前价钱。例牌金沙海生虾（$128）金沙虾有10只左右，份量适中，而且师傅有剪走啲脚同虾头嘅刺，几好。可惜炸得唔够脆，啲虾壳好硬，都系无办法成只食，咸蛋都唔系好够味，有啲普通。细粉豉油皇银芽鹅肠（$48）鹅肠细细份唔会太多，做小食啱啱好。食落都几香几爽口，唔会太韧。例牌醒胃黑醋骨（$108）排骨食落有啲黑醋味，酸酸甜甜，都几香几开胃。不过以普通嘅黑醋排骨黎讲，佢个价钱都偏贵。百花炸酿蟹箝（$55@1只）本来觉得$55一只都几贵，但一开就见到佢好大只！蟹钳炸到好脆好香口，食落都爽口好食。不过食到真蟹肉嘅时候就有啲霉味，感觉唔系好新鲜。红烧乳鸽（$78）乳鸽烧得几香，而且份量啱啱好唔会太细只，食落啖啖肉。餐厅仲附送埋豉油同椒盐，不过就咁食已经有味，所以今次就无点到啦。福如东海炒饭（$118）炒饭配料有菜、鸡肉同虾，都算几足料，不过红萝卜食落有啲硬，麻麻地，成个炒饭都系不过不失。去到见到佢每日都有做唔同优惠，今次外卖自取就有68折，折完系$475左右。