半茶匙 (已結業)

系东广场有个迷你嘅food court，果到有好多好食嘅餐厅，行完街想买甜品食，所以去到依间台式饮品店，店员嘅态度几友善。台湾手工芋圆包左一份芋圆同仙草，仲可以任选三款配料，平时常见都可以点到。今次拣左紫薯泥、黑糖晶球同红豆。芋圆有蕃薯圆、芋头圆同紫薯圆，都算大粒，食落几烟韧，唔会太粉；仙草食落几滑，配埋糖水都几好味。红豆食落系一粒粒，唔钟意食淋晒嘅朋友会钟意，但都唔会太生；几钟意黑糖晶球，佢系黑糖味嘅小果冻，口感Q弹爽脆，仲有浓郁嘅黑糖味，不过紫薯泥有少少苦，但个泥整得几好。本身拣芋泥肉松吐司嘅时候有少少担心唔好食，芋泥同肉松好似大缆都扯唔埋，但食落嘅时候又几夹，咸咸地嘅肉松同少少甜嘅芋头都系一个估唔到嘅好配搭。芋泥整到几香滑，冇芋头渣，多士整到岩岩好，唔会太㶶。琥珀波霸鲜奶系黑糖珍珠鲜奶，系平时必点嘅饮品。饮落都唔错，佢有浓郁嘅黑糖Q弹珍珠，仲有浓郁鲜奶，有浓浓嘅黑糖奶香气。