Ben哥廚房 (已結業)

名厨李锦联喺深水埗西九龙中心美食广场开咗档Ben哥厨房，用晒自己做招牌，佢亦经常喺舖打趸，其实路经过好多次，不过开业咁耐都未试过，今日就即管试一次。佢有饭盒同埋有私房𩠌卖。我见佢铺面有四个煲，印象中平时行过见到煲入面系有𩠌嘅，但今日系吉嘅，我以为卖晒，点知店员即系佢老婆就话全部都有。OK咁我哋就照落单啦，然后就见佢攞啲𩠌出嚟翻热，感觉上已经觉得麻麻哋，早知系咁，我情愿去返食三𩠌饭好过。首先拣咗个咖喱牛腩饭，饭盒都几精致，系将菜、𩠌同饭分开入盒，感觉卫生企理。咖喱完全唔辣，一啲都唔浓味，唔知佢属于边种咖喱，我仲食到有少少带酸嘅味道。青瓜有四粒，唔似系腌制过，饭嘅份量唔算多，男士可能唔多够食，牛腩份量可接受，另外仲有几旧薯仔，我食到薯仔系带点爽口，应该系炆得未够时间。另外叫咗佢嘅秘制李锦鸡饭，同样系有青瓜四粒、白饭少许，鸡嘅味道其实唔错，虽然有少少偏咸，但佢胜在鸡胸嘅部位都可以做到肉质嫩滑，仲有啲鸡汁浸住，呢个唔错，可以一试！ $45一个饭盒，份量唔多，唔包饮品，以深水埗food court来讲价钱算相对地高企，如果唔系挂住李锦联呢个招牌，我谂佢好快已经挨唔住。