Chatuchak (已結業)

food court食lunch就系贪快贪选择多，平就唔平得去边㗎喇，好彩味道都叫做可以接受，所以平日放lunch都会去下希慎food court。通常食嚟食去都系果几间，今日认认真真兜个圈，发现上完电梯2:00方向嘅角落头入边有间泰国嘢，见到嘅收银员同工作人员都系疑似来自泰国嘅姐姐，断估煮出嚟嘅嘢都几有泰国地道味道啩，所以前后点咗个「泰式肉碎煎蛋饭」同埋「泰式湿炒牛河」，再加个小食「芭堤雅烧鸡扒」。个「泰式肉碎煎蛋饭」坚系唔就住香港人一般食辣嘅程度，🥵辣到我系咁飙汗，但又辣得好过瘾，加上肉碎炒得好香口惹味，愈食愈想爬多两啖饭。「泰式湿炒牛河」都试咗几啖，唔系一般香港食开嘅河粉，呢只厚身阔身啲，而且唔系一条条，而系一块块，每块都被芡汁厚厚包裹住，味道自然唔使多讲，相当香浓。至于个「烧鸡扒」就无上面两款咁惊喜咁好食，冻嘅，本身又无乜味道，要靠泰式酸辣酱提味。整体嚟讲，佢啲粉面饭味道质素，绝对食得过，系可以encore嘅水准💪🏼。