鮨處松戶 (彩星集團大廈)

营业中

休息中

记得大岛与龙威曾经介绍过呢间餐厅，我当时都好有兴趣，始终喺香港食日本嘢，如果有日本人推介嘅话都会有多啲信心。知道近排佢哋新增咗厨师发办嘅晚餐Set, 而且价钱都相对实惠，只系$750 ，就上嚟试吓。厨师发办最好嘅地方就真系完全唔使谂食乜，同埋出菜嘅次序都有设计过，一开始有个关东煮前菜暖下个肚仔先，简单而充实嘅味道就系准备要食嚟紧嘅刺身五品，今日嘅几款刺身都非常新鲜，中拖罗超级厚切，满口油香，另外非常欣赏烧过嘅银鳕鱼BB，仲有就系之后嘅巨型日本生蚝，香甜得紧要。五件寿司都非常之出色，特别欣赏师傅手握饭嘅功力，唔会过松过紧，而且调味亦都唔会Over，食到鱼嘅鲜甜，海老配烧过嘅虾膏极高品质，另外带子配黑松露配搭新鲜，都好讲师傅嘅创意同埋对食材嘅认识。当日我哋嘅烧物系烧白鳝，好食到飞起，又Juicy又甘香，手卷都唔系简单货色，吞拿鱼系火炙过，连紫菜都足够香脆，配埋之后个鲜鱼汤同埋一球雪糕，成个海鲜餐非常圆满。依家喺香港夜晚要食厨师拍板，动辄都要过千，呢度收$750 有咁嘅质素，性价比高。同埋如果唔钟意坐吧枱，系可以拣坐房或者卡位，啱晒钟意多啲私人空间嘅人或家庭。