美食軒點心皇

营业中

休息中

荃湾要食一盅两件，好多选择，想怀旧，上山有，屋邨有，其他区嘅过江龙都有！但评价好似都麻麻，卖特色为主。依间我唔敢讲历史，真系揾唔到，但网评已可追朔十年，系附近打工仔间亦少有人气。每日返工时间都有打工仔嚟买包、买饭，全部都外卖，相信唔系个个都无时间，而系入面过几将枱一早已坐满，好似系固定班底，就算迟嚟都有熟客帮霸位。一早食饭多唔多？唔一定多，但我识人买定做午餐，一来中午唔洗出嚟迫，二来早市盅头饭平午市六蚊，肉比出面都多，返叮都抵过买叮叮。叉烧包一笼三只，正常大细，叉烧口感同调味无特别，重点在于个包松软，又实用，无粉味，甜味出哂嚟！其他点心都标准大小，最欣赏烧卖，绞得天然起胶，又带点虾肉粒，无加到粉，口感天然弹牙，本身对好多化学物过敏，而冰鲜虾经常用化学物增加口感，做到所谓玻璃虾嘅感觉，一般餐厅系冲洗同煮嘅过程已大幅稀释，但做点心通常都无，直接加工，直接蒸，食完依类食物我都会感不适，但依间嘅出品，唔单止无事，试过有次冻咗食，味道竟然完全无影响！虾饺皮薄，内有几只完整虾肉，夹起无事，包装时个盒太满有只压破皮，馅仍完整无散开；粉果皮通常好粘，但依间唔粘之余亦无油臭味，口感足，各方面都控制得好。