大公雞 (已結業)

又到周未模型时间，所以一早同朋友出左去工作室开工砌模型及上油。去到LUNCH时间就近近地过隔离KCC开餐，早排都系食汉堡包多，今日转口味食台湾野。呢度坐位都阔落，所以拣左窗口位晒下太阳补充维他命Ｄ。套餐都多选择，加少少钱就有个小食及饮品，唔错。台式半根半腩饭，牛腩唔系讲笑咁大件仲要打孖上！入口好腍同入味，但唔似港式咁咁重八角味，淡口一啲配饭唔错。牛筋就煮到胶质出晒黎极黏口，啱晒对得冷气多嘅我。不得不赞下个腌萝卜，够脆爽酸甜，可以降低返下牛腩嘅饱滞感。招牌牛肉面。牛肉同样好大件同入味，面底用左较厚身嘅关庙面所以浸耐啲都唔会发胀。汤底浓厚，但不油腻味道同台湾食过嘅有八成相似。跟餐点左盐酥鸡及皮蛋豆腐，盐酥鸡炸得干身脆口，食落咸香惹味，几唔错。而皮蛋豆腐就无咩特别，算系清一清味觉都可以。奶盖乌龙绿茶。奶盖都做得几杰身，唔会咁快融化入去乌龙入面。但觉得茶底本身偏甜左啲可以等啲冰再融下先饮会更好。以新开店铺黎讲算系咁，最怀旧系用上公鸡碗几有特色。