老厝邊

营业中

休息中

Weekend同啲朋友去铜锣湾行街，行到五六点就揾餐厅医肚，早两日先食完西餐，所以今日就想食返啲台式嘢。行去渣甸坊就见到呢间餐厅真系开正我胃口。见到入边坐满晒人就知道一定冇伏。我朋友话想食多啲小食，所以就叫咗台式蒜片香肠，炸鱿鱼。我就叫咗个红葱油鸡肉便当加个烫青菜。第一个上嘅系蒜片香肠，份量都算多，起码有三条切开开咗，识落10分惹味，本身有酸盐加埋蒜片同埋一啲炸咗嘅葱，食完一旧又一旧。食食吓醒起冇嗌嘢饮，就再加多咗个爱玉芒果绿茶。然后好快我嘅便当同埋青菜都上咗，个便当好丰富，有鸡肉，芽菜，薯仔，半只卤蛋，仲有少量嘅瓜。先讲个鸡肉，肉质唔错，唔会谐霎霎，配上红葱油酱，味道好够。佢个薯仔同埋芽菜，本身都系微微有咸味，配埋个鸡一齐食就唔会咁寡。饭嘅份量好足够，个菜亦都唔系白烚冇味。总括嚟讲成个便当质素颇高，比起平时就咁嗌嘅台湾饭类，加多咗啲层次同埋口感。个青菜应该系油盐水浸，食落仲系好爽，配少量嘅酱油，可以喺浓味嘅嘢入边refresh一下。个鱿鱼一上卖相已经10分吸引，佢大部份都系鱿鱼须，少量嘅鱿鱼粒。佢个炸粉条配得好好，唔会皮还皮鱿鱼还鱿鱼。食物亦都10分香口，系真系脆嘅而唔系淋咗嘅炸皮。