圓山台灣料理 (已結業)

毕业之后各有各工作，不过朋友系要见㗎嘛，所以今日约左系圆山台湾料理食晚饭。餐厅名字感觉系普通台湾餐厅，点知一入去发现系茶楼式经营，装潢俾人感觉金碧辉煌，大家都坐得舒服。系云云套餐之中，自选八道风味菜最吸引我，每道菜平均唔驶$100，食物选择亦多。干煸四季豆炒得干爽唔算太油腻，而且有适量肉碎，肉味香浓。蚵仔煎比较似煎蛋，亦唔系配有酸甜酱汁𠮶种。蛋味几香，酥脆但失去香滑口感。 平时食卤肉饭嘅卤肉都系细细粒，今次系第一次食咁大件嘅卤肉，肉质唔鞋，味道咸中带甜，入晒味。三杯鸡上晒色，惹味同时唔会太油。另外酱汁香浓，送饭一流。蛋黄肉成坐山咁高，味道比一般肉饼更甜，有少少咬口。咕噜黑豚肉比一般咕噜肉更加嫩滑，酱汁酸度刚刚好。温室南瓜炒鲜饱要加$180升级先有。南瓜同鲍鱼比例算合理，鲍鱼几大只肉质弹牙，南瓜稍为煎过所以几香口。另外仲叫咗碟台湾炒新竹米粉，分量大之外，米粉稍为湿润唔会太干，配菜系菇、鸡肉等等，简单就是美。最后食埋小仓红豆椰汁糕就结束今次晚餐。自己感觉圆山台湾料理不只售卖台式食物，更包含中国菜嘅元素。性价比都高，非常适合多人聚餐。