古早牛肉麵 (已結業)

今晚同细妹出深水埗，突然口痕想食台湾野，行行吓见到间古早味牛肉面，于是我哋谂都唔谂就谂住入去试吓啦。我哋两个其实都唔算太肚饿，主要系有啲口痕想食啲小食，所以我哋叫咗碗细鸡肉饭、海苔炸鸡扒同朱古力珍珠奶茶。等菜到嘅期间我四围望一望间餐厅，发现间餐厅嘅装修都好有旧年代台湾嘅风味，我都忍唔住影咗几张相，唔讲以为自己去咗台湾添啊。啲嘢食话咁快就嚟咗，个鸡扒外脆内嫩，而且都好大块好好食，碗鸡肉饭细细碗但系都好饱肚，连埋少少鸡油真系好惹味。朱古力珍珠奶茶意外地都好大杯，一个人饮都真系几饱，饮得出佢系用咗可可粉去冲嘅，啱啱好中和返珍珠奶茶嘅甜味，我本身就唔系太钟意过甜嘅珍珠奶茶，今次嗌左呢个微糖嘅朱古力珍珠奶茶，甜到就真系啱啱好啦。珍珠都好大粒好Q软，美中不足嘅地方就系太少珍珠啦，好想再咬多啲珍珠。