幸福班戟 (K11 Musea) (已結業)

日本pancake已经喺香港风靡咗一段好长嘅时间，每次有新舖头开，都会出现好长嘅人龙、好难嘅订枱同埋好多人嘅讨论。虽然我都系一个pancake嘅粉丝，但系因为我唔钟意排队，所以通常我会等热潮过咗之后先至去试。 好耐之前我已经想去食幸福班戟，𠮶阵时只有铜锣湾一间分店，而且网上订枱有唔少限制，所以一直都未有机会食到。 早排我发现尖沙咀有分店，我谂隔咗咁耐又有咁多其他品牌嘅日本班戟， 应该少啲人排挂，我专登拣比较早嘅时间去，即系大概早餐至午餐之间嘅时间，虽然都要等但系我大概等咗一个字就入得。 估唔到咁早已经有咁多人嚟食班戟! 入到去，可能系新开啦，觉得间舖都几靓几舒服，好啱女仔嘅style。我点咗个朱古力香蕉班戟， 佢系即叫即整嘅，所以都要畀啲时间等佢制作。班戟卖相都ok嘅，但系因为佢系用个纸盘装住，所以一定冇摆喺个靓碟影咁好睇。 食落口班戟都算松软，但系个蛋香味唔够，真系有啲失望，因为蛋香味系我心目中系好食嘅班戟一个好重要嘅元素。而朱古力香蕉忌廉都系咁啦，正正常常。整体嚟讲味道ok嘅，不过唔算好好食，好彩唔使排咁耐，当小食咁食下都ok嘅，但如果排咁耐咁样嘅味道一定会失望啦。