一素食譜

营业中

休息中

甚少踏足观塘, 如果唔系约咗朋友去附近睇戏, 其实真系唔会去。早咗去, 周围逛一下, 顺便食lunch。最近食肉多, 决定食一下素。误打误撞, 行到去东广场, 见到呢间, 价钱都合理, 就坐低咗。叫咗车仔面 --- 地瓜面 + 秋葵 + 云耳 + 冬菇 + 珍珠贡丸 + 卤水豆干, 生菜系送嘅。地瓜面好幼, 幼到似 angel hair, 好滑, 但冇乜味, 好彩汤底够味, 唔太咸, 食得出蔬菜甜味, 配埋地瓜面啱啱好！秋葵 同 生菜都好新鲜, 翠绿嘅！云耳 同 冬菇有焖过, 好入味, 唔似得有D冇诚意嘅餐厅, 求其整熟、淡荗荗.......... 云耳系靓嘢, 爽口嘅, 形状有D似猫耳朵。是日例汤系老黄瓜赤小豆, 我至爱！足料, 我连渣都食埋, 哈哈！见到素蛋挞, 忍唔住叫埋嚟试下。店员会帮你加热, 虽然系番热, 又冇用蛋或奶, 但出乎意料地味道ok (虽然个样麻麻地, 哈哈)。整体水准不俗, 价钱亦公道, 好有heart嘅小店 (肯定冇用味精! 因为我食完唔口渴, 哈哈), 唔错！ 下次再去观塘, 会再去帮衬。