東寶小館 (已搬遷) 新店位置

友人话识东宝啲人，所以由佢打去订位兼订名菜『风沙鸡』。一行七人，𩠌菜由友人们发板。一上到去，部分友人已经到咗喇。坐低咗一阵，见有个侍应狂与友人『吹水』，一讲就讲咗十分钟。之后啲𩠌菜，食完一样就要等劲耐至上另外一样。等到第三样𩠌，之前果位过嚟『吹水』嘅侍应又再过嚟『吹咗一轮水』，之后就走咗。友人见个『风沙鸡』仲未到就揾番果个侍应嚟问，果位人兄一过到嚟，人地问乜佢都根本冇心听，只系挂住大大声声咁讲埋啲废话，之后我朋友就拉开咗佢好认真咁问佢个𩠌几时得。友人后来返到嚟坐低就同我地讲，个『风沙鸡』卖哂喇㖞！妖... 真系劲扫兴。之后我同友人讲，如果唔系条友挂住吹水就唔会将我地订咗果份俾咗人啦！佢点做嘢咖？友人答我话果个唔系伙计，系老板嚟咖！之后我咪话啰，老板又如何呀？老板就可以得失客人咖喇？！总括嚟讲，啲嘢真系唔好食，唯独得个炒蛏子系最好，其他嘢食，一系就太干，一系就太喊，一系就淡而无味，而且仲要收咁贵添。环境嘈都唔紧要，最主要系你呀老板，响人耳边讲嘢大大声声，真系搞到我头都晕呀！