雲南小鍋米線 (已結業)

今晚OT 到10点，收工之后非常肚饿，就去深水埗呢个美食天堂到医肚。来到深水埗，本身谂住食返名店文记车仔面，点知佢本舖装修紧!!!!!晴天霹雳。再睇睇佢隔离2间新舖，门外排左十几人。。唔知等到几时先有得食，唯有放弃。附近几间我食开的店，都已经打羊。见到文记隔离的云南小锅无咩人，唔使排队，米线又系我杯茶，就系度医肚啦。极速叫左个猪耳鸡丝腩肉小锅米线小辣多酸，超饿的缘故叫多个卤水牛腱。多谢阿姐唔使10分钟就拎黎俾我救我一命。卤水猪耳爽口入味，不过就切得超短小幼细，有啲碎，有小许影响了口感。腩肉肥瘦适中，厚薄相宜，肉质软淋幼滑，不错。米线软硬程度适中，汤底叫左多酸真系有番应有的酸度。卤水牛腱太咸，点左侧边的酸醋仍然掩盖不了佢的咸劲。食饱饱，返去冲凉个靓凉瞓觉，明天再战。