Page Common

营业中

休息中

呢间cafe嘅tiramisu被誉为全港最好食嘅tiramisu，之前嚟过几次唔系卖晒就系太多人排队，今日第四次来访终于食到。另外仲嗌咗一个沙律，补充膳食纤维摄取量。鲜橙羽衣甘蓝藜麦沙律 $68本身只系谂住求其嗌个沙律，点知食落有惊喜。沙律酱汁酸酸甜甜，盖过咗羽衣甘蓝嘅草青味，配上一粒粒藜麦同洋葱碎，增加口感嘅层次。虽然鲜橙分量太少得几片，而且完全唔甜，但系整体个沙律都好食，系一道唔错几开胃菜。提拉米苏 $52不过正所谓希望越大失望越大，呢件tiramisu同我嘅期望有好大差距。首先以卖相嚟讲，佢嘅四边切口唔齐，仲有一小块飞咗出嚟。味道而言，个人认为咖啡味同酒味都唔够浓。个人比较钟意手指饼浸到湿晒嘅感觉，而呢件tiramisu嘅手指饼中间仲系白雪雪嘅，食落口感唔够湿润。总括而言，Cafe嘅食物不过不失，定价进取，但系味道只可以用普通嚟形容。另外值得一提嘅系Cafe采用自助形式，喺counter落完单之后会比一部取餐机你，到部机响再出counter攞，而且食完之后要自己收拾枱面将餐具放喺指定位置分类摆放。如果咁啱经过唔使排队可以一试，但系如果山长水远过到嚟要排长龙嘅话就唔值。