後生仔海南雞1998 (已結業)

见佢哋冇得6点后堂食，专登搭车去支持佢哋。明明过咗繁忙食晏时间（2点入去），店内唔算太多客人，但啲店员都做错嘢，一嚟嗌乜冇乜（冇青咖哩，冇金边粉，冇白饭得油饭，冇网虾春卷），咁原本嗌咗个青咖哩饭转炸虾饼堂食，点知等好耐，佢哋落单以为系外卖....。我另外嗌海南鸡饭拎走，卖单时张单又冇删到个青咖喱饭，又唔知要转个海南鸡饭俾我拎走（张单完全冇落），要我提话有个鸡饭先识即刻整。未完，咁有mee会员做九折优惠，我啱啱dl个app唔识用，卖单问佢哋侍应点用个优惠，几个都唔识，最后有个在厨房做嘢嘅女仔心水清识用。至于味道，失望，我个猪颈肉饭啲肉竟然唔系热，涷嘅! 搞到偏硬。个海南鸡饭系佢哋招牌（因外卖回家冇影相），但啲鸡煮得太熟，变咗啲肉比较死实。椰汁糕冇乜班兰味，椰汁味亦唔重，但口感唔错烟烟韧韧。炸虾饼就有啲辣，同埋唔夹佢个柚子汁。如果有啲人唔食得辣就唔好叫虾饼啦。结论唔会再嚟，我楼下两间海南鸡饭店仲好食过佢，滑过佢，猪颈肉又热过佢。发觉次次帮衬黄店同人迫都算，食物水准都不似预期，为何要贴钱买难受？