Pho Up (已結業)

近年中環開左一間又一間越南粉麵店，間間都索價近百，成行成市開到好似日本拉麵店咁多。今次食呢間位置喺荷李活道，冇記錯前身就係日本拉麵店，可見飲食業真係唔易做，潮流呢家野話變就變。三款湯粉，見呢度有米線食都糾結左一陣，因為上次喺九如坊食嗰間有好印象。最後都係決定要返牛肉河😛有啲人好執著牛河就要全部牛肉，但越來越多地方做嘅牛河都唔止生熟牛肉咁簡單。呢碗牛河有生牛肉片、牛丸、牛腩、牛尾。先講個湯，有色但只係咸咸地，唔算好濃牛味，河粉夾起唔易斷，掛湯力都ok。生牛肉仲見到係未熟嘅👍🏻雖然唔係滿佈雪花，但食落竟然非常嫩滑！牛腩用上和牛，炆得好腍，兼且肉味特濃，牛尾用少少黑椒炆煮，唯質感稍靭，牛丸質素都唔錯。$88唔加一，絕對唔平，但食物質素、味道、裝修都對得住呢個價錢，又加上早前喺附近另一家牛肉粉嘅唔愉快經驗，更顯得呢一間物有所值。