大戶屋 (已結業)

第一次嚟大户屋食饭叫咗个鲭鱼定食，味道贯彻日本嘅家庭料理，味道好清好简单，唔会食到个口好重味精，不过质素就未令人好惊艳。于是我夹咗友人叫嘅味增猪扒定食试吓，一试不得了，个汁酱煮得好香，于是我决定再嚟多次到我自己嗌呢个定食！平时食炸物最怕浸落啲汁系浸到稔晒，啲炸粉会即刻变到好似粉粒咁好唔雅观之余，口感亦都好差，大户屋嘅味增猪扒完全无呢个问题，炸粉本身够脆身，而且个汁酱真系好浓郁，索咗入旧猪扒到反而好惹味。猪扒本身啖啖肉，好厚身好松软，上菜时用热锅呈上，食到最后一旧猪扒都系热身。有时出去食呢啲扒餐会饱到个胃好唔舒服，但呢个定食反而会食到好开胃，一碗饭扒干净晒，食日本野就系会有种食完身体好干净嘅感觉，唔会食到口寡寡，又唔需要饮品佐饭。友人今次叫咗个柚子胡椒鸡扒定食，味道一贯咁好，口感好清新，不过我都系推介味增猪扒＞柚子胡椒鸡扒＞鲭鱼定食！食完主餐后仲叫咗个绿茶雪糕伴蕨饼，四十零蚊一个雪糕有蕨饼有丸子有红豆仲有谷物系底，完胜所有出面打著日本名物旗号但卖到好贵又唔好味嘅雪糕！*荔枝角店坐得舒服过铜锣湾分店，座台唔会排到密质质，而且有走动空间，充满日式家庭料理嘅感觉。