食之劇場餐廳 (已結業)

今晚同细妹庆祝考试顺利，仲有我揾到新工，特登book咗枱嚟食omakase，食返餐好嘅奖励下自己。嚟到人迹罕至嘅白沙湾，有一间酒店喺码头旁边，貌似可以静静哋放松下。入到餐厅被安排坐喺落地玻璃旁边，伴随住码头景色真系名正言顺嘅秀色可餐。精选和食晚宴《海 Umi Set》$600/位一客和食晚宴包含前菜、刺身、蒸蛋、烧物、手卷、汤同甜品。首先登场嘅前菜已经令我哋好惊喜，一个木盒打开有烟雾嘅效果，仲有摆设得非常细腻嘅装饰，配上味道酸酸甜甜嘅口感，非常开胃。刺身2点分别系带子同鲷鱼，实在太鲜甜啦，我都辞穷唔识形容呀！蒸蛋估佢唔到里面有鳗鱼做饀，仲有大大粒鱼子配滑嘟嘟嘅水蛋，好味。主食有蟹肉飞鱼籽配多士同食到最尾都仲有鱼生嘅手卷，再用味噌汤作结。甜品系厨师手制士多啤梨雪糕配白酒煮黄桃，精致又满足。