正宗上海生煎皇 (已結業)

久闻大名，但一直都未有机会食到。咁啱今日嚟到大埔墟，决定试试佢。中午时间有午餐供应，自选小食主食加饮品，大约$40-$50。一场嚟到当然要试下招牌生煎包，主食叫咗厚切炸排骨菜饭，加多杯冻豆浆。厚切炸排骨菜饭初头以为炸排骨系一般染有炸浆嘅排骨，但原来呢一种系无用炸浆。呢种炸排骨食落感觉无咁热气又无咁干，可能系厚切嘅关系，排骨保持到好juicy，再加上少少甜味，送饭一流！个饭食到一半生煎包先上，可能因为即叫即煮。生煎包卖相好靓，唔会油淋淋，面头煎到少少金黄色，再配几粒黑白芝麻，忍唔住即刻夹起嚟食。一咬落去，d汁即时标出嚟！摆喺旁边嘅电话都差d遭殃！果然系招牌菜，外皮软熟中有少少脆口，唔油腻，馅料丰富，肉汁满泻！$4x 有呢个质素，好满意。