民華魚蛋粉麵

营业中

休息中

广福里有3间较旺嘅点心+面店，3间嘅门口都有点心/盅饭外卖，而且经常客似云来，今日终于试埋最后一间。Order嘅亦系云吞面，可以比较吓吖麻。但侍应话呢度嘅牛腩系清汤腩，所以冇得加腩汁。佢仲话呢度嘅汤已系鱼汤，所以已经够味。咁冇办法啦…虽然呢个唔系peak hour，但店员都好似好忙咁。每次有客嗌店员都会话要等等。等咗阵，面到喇。汤底相对带白，而且油份较多，但味道确系鲜甜，系未落辣油之前要饮多几啖。面质亦弹牙，唔知系咪因为汤底有油份嘅关系，夹面时觉得面好滑。至于云吞就一半虾一半肉，但每粒size唔系好平均，5粒里面有2粒零舍细。但整体嚟讲，食落就觉得少咗一种惹味同想食唔停嘅感觉。于是就决定嗌多碟烧卖去增加食嘅满足感。店员亦系话要等等…确实等咗阵，um…虽然烧卖都系大大粒，但唔算好好食。有一粒食落似一嚿较实嘅鸡肉咁，有啲失望。呢度其实唔系唔好食，可能系自己期望太高，所以有啲失望啫。