周記點心

营业中

休息中

每次到西环都要用好多时间去谂食乜，一来唔熟依头，二来依区有好多第二区冇嘅小店，所以间间都会想试下，今日就系比依间周记门口嘅相吸引咗入去。依间舖头卖嘅可以算是fusion点心吧，有虾饺烧卖，但又有西多士冻柠茶，大概全世界只有系香港依个地方，先会有咁跳嘅menu。点咗佢哋嘅下午茶餐，XO酱炒萝卜糕+餐饮（$52），另外点咗间舖嘅名物芝麻虾多士（$52）。先嚟嘅系萝卜糕，睇个样系唔错嘅，除咗有正常会用嘅芽菜、红萝卜一齐炒之外，仲有我钟意嘅唐芹，面头仲洒咗啲炒过嘅虾皮，样系唔错嘅，但萝卜糕嘅质地有啲奇怪，点解食落会有啲烟韧嘅？感觉有啲似炸脆咗再淋翻咁，但炒萝卜糕唔系应该干身架咩🤔我睇唔透，而且佢应该用咗非常多油去炒，碟底全是油，真系有影响食欲。再嚟嘅系芝麻虾多士，依个就真系唔错，方包中间夹住厚厚嘅虾胶，面头再黐满芝麻去炸，出嚟金黄色证明炸嘅时间恰到好处，不但样靓亦都好香，只系因为面包系一样非常吸油嘅食材，所以佢都唔例外，配上沙律酱本来酸酸哋系可以解腻嘅，不过谂深一层，沙律酱其实都系用油打成，所以都系点少少好喇。总结就系，下次如果再去，食蒸嘅点心好了，因为炸嘅太油喇。