靚湯廚房

营业中

休息中

响佐敦𠮶边行紧去尖沙咀东部嘅时候谂起要食嘢，因为天气太热，大家都唔想出去，所以就谂住买外卖返去食，经过见到靓汤厨房其中一个朋友好想食酸甜嘢，所以就买咗呢间嘅外卖嚟试吓。分别嗌咗三个唔同嘅饭，加一个汤 。菠萝咕噜猪扒菜饭，猪扒返到嚟仲系脆嘅，个汁都有啲中式咕噜肉味，又唔会感觉太杰，都好有中式咕噜肉味道，啲汁都够捞饭嘅。加咗𠮶个汤系象拔蚌鲍片椰子雪耳杞子红枣煲竹丝鸡，汤嘅味道系几好嘅，亦都唔算细碗，不过佢系一啲汤渣都冇嘅，唔介意嘅话都值得饮。瑞士汁鸡翼饭就有四只鸡翼，啲鸡翼都几大只，唔似好多餐厅用啲好细只嘅鸡翼，个汁都有太平馆嘅感觉，同埋用嚟捞饭啱啱好，唔会太甜。最后仲有日式烧肉汁猪扒饭，猪扒都系仲系脆嘅，份量都几多，烧肉汁就会比较偏甜，钟唔钟意食就要睇个人口味，整体上呢间餐厅啲嘢食味道都唔错。