金城餐廳 (已搬遷) 新店位置

Yummy!Yummy!旧年睇过苏Good介绍呢间餐厅，只觉得系呀苏自己觉得好食啫，唔系太相信会有咁大o既惊喜。就系呢一日，心情有啲闷，两公婆喳架车去咗筲箕湾东大街𠮶头行吓，散吓闷啰！到达时已经12点有多，经过呢间舖，哗！人山人海呀！见又未食嘢，咪一心要去试吓个龙趸炒河系咪咁得先啰！虽则佢哋系有「人满之患」，但啲侍应真系好招待，一见有人行入间舖就会即刻招呼问几多位，尽量安排，唔会待慢你o架。唔驶等就比我哋见到门口有两个位，紧系嗱嗱声埋位啦！第一时间问老板娘有冇龙趸片，有就要炒河，真好彩，不过想试吓个炒菜就冇嘞！因为午市可能做唔切o既关系，冇得落单啰！最终两公婆叫咗个龙趸片炒河，两杯冻饮，个炒河食唔到佢有味精，龙趸片好新鲜、好鲜甜、唔会一夹就散，肉质好爽脆，又好滑，食完后再饮埋杯冻柠茶，个口都仲有啲龙趸片o既味道，你话正唔正啦？埋单都唔驶$100，去边度食到咁平o既、又咁新鲜o既海鱼呢？我就话只此一家嘞！赞赞赞！