黑樺牛 (已結業)

见到好多人介绍呢间野，价钱同平时出去打个边炉都差唔多，但系任食和牛，好似好爽，于是 book 位试试佢。先讲左两样唔好嘅野先，一坐低佢就嚟左个「海鲜拼盘」，真系不吃也罢，三样野都唔系好新鲜，留肚食牛稳阵。另一样野就系，佢张枱垫系有写每一款大约要渌几耐，但系建议都系睇返实际情况好啲，因为佢啲肉全部都系雪到冰晒，明显见到上枱肉面仲有冰，其实佢建议嘅4至6秒系溶冰都唔够。 汤底叫左个「台湾麻辣火山锅」，点火果下系几型嘅，非常 IGable。 佢个汤都几浓味，但系如果好钟意食辣嘅朋友应该系会觉得唔辣，辣度系米线小辣都谈唔上。一坐低果下佢立即就放低左八款唔同嘅和牛，试左钟意边只就再追加，其中我觉得「特上霜降小排」「肩胛梅花」同「玉子后腰肉」都系味道比较突出，其他就一般般。佢嘅茶、沙冰同雪糕都系随意自取，全部都正常发挥无伏，成餐饭可能同大家心目中「食和牛」嘅印象不大相同，但系其实都算抵玩，佢仲可以加$38位 啤酒任饮，坐又唔会话好迫，如果有三四个人去狂轰霜降其实可以～！