一盛極牛 (已結業)

一向爱食拉面，呢日就慕名来到主打牛骨汤拉面嘅一盛极牛。小店位置较为刁钻，不过平日晚市都唔少人。餐厅将成份一一列明，汤底以带骨髓嘅牛骨汤熬二十小时而成，除咗牛味香浓之外，亦能补力气和暖身。选用嘅和牛亦好讲究，系来自熊本县嘅『和王』，和王数量稀少，而且仲有要求一定要BMS油花标准等级达到6以上，啱晒我哋两个对牛有要求嘅牛魔王！一如其他日本小店，一盛极牛贵精不贵多，只卖三样食品－－极牛拉面、白牛拉面及牛肉饭。而和牛部分只分为和牛刺身同火焰和牛。点咗一碗和牛刺身白牛拉面(2分 $158）以及火焰和牛极牛拉面。白牛拉面嘅分别在于汤头加咗白松露，一上枱已经闻到阵阵松露香，令人食欲大开。虽然略为盖过牛骨汤嘅原味，但仍然值得推荐。和牛刺身我哋选咗2分，只有矜贵嘅两片，和牛脂肪分布平均，入口软嫩充满油香，正！火焰和牛极牛拉面则可以更加食到牛骨汤嘅精髓，牛骨汤鲜甜清醇，我哋忍唔住饮到一啖接一啖！通常牛肉烧过后，肉味会更加突出，火焰和牛亦唔例外，比刺身更重牛味，我个人更加钟意。溏心蛋流心度满意。小店用嘅真空鸡卵面都好有水准，可以选唔同硬度，我选咗普通硬度，入口挂汁兼有弹性！整体都唔错，会回头！